еМагазин
Image default
Македонија ТОП СТОРИИ

Во техничката влада секој акт и документ мора да биде потпишан од министерот и заменикот, во спротивно не важи

Сто дена пред пред одржувањето на избори за пратеници, а по претходна оставка на премиерот Зоран Заев, Собранието избира нова влада, преодна, предводена од нов премиер, Оливер Спасовски, кој го номинираше партијата на власт.

Сите овие процедури се согласно Законот за Влада, а решението за техничка Влада првично беше применето по кризата која настана, откако Заев како лидер на опозицијата во 2015 година почна со објавувањето на „бомбите“, по што следеа предвремени избори.

Овој концепт, кој сега е и законска обврска, е дел од Пржинскиот договор што во 2016 година го постигнаа поранешниот премиер Никола Груевски и Заев, кој тогаш беше во опозиција и претставници на другите партии со помош на меѓународната заедница.

Согласно законот, заради организирање на предвремените избори Собранието на
предлог на премиерот сто дена пред денот на одржувањето на изборите избира министер за внатрешни работи и министер за труд и социјална политика, на предлог на опозицијата со мандат кој трае до денот на објавувањето на конечните резултати од Државната изборна комисија (ДИК) за спроведените избори, по што мандатот им престанува по сила на закон.

Наќе Чулев и Рахела Мизрахи, беа предлозите на ВМРО-ДПМНЕ и тие се избрани за министри за внатрешни работи, односно труд и социјална политика.

Надлежностите на министрите, но и на замениците министри кои се избираат во техничката Влада се поинакви од оние што ги имаат во редовниот владин состав.

Министерот за внатрешни работи може да изврши најмногу 15 разрешувања или распоредувања, на пониско или повисоко место на носители на раководна позиција во министерството, во согласност со закон.

Првиот човек на МВР во техничката Влада може да изврши и хоризонтални распоредувања на вработените кои се на негов предлог во бројката до 10 отсот од бројот на хоризонтални распоредувања базирани на просекот на овие распоредувања во 2013 и 2014 година.

Заради организација на предвремените избори Собранието на предлог на техничкиот премиер именува и дополнителен заменик на министерот во Министерството за внатрешни работи, предложен од политичката партија на власт и во Министерството за труд и социјална политика, исто така предлог на власта.

Во овој случај на овие функции дојдоа Славјанка Петровска и Санела Шкријејљ.

Заменици, но на предлог на опозицијата, има и во Министерството за финасии, Министерството за земјоделство, шумарство и водостопанство и Министерството за информатичко општество и администрација.

ВМРО-ДПМНЕ за овие позиции ги предложи, а Собранието ги избра Гордана Димитриеска Кочоска, Цветан Трипуновски и Невенка Стаменковска Стојковски.

Мандатот на дополнителниот заменик на министерот трае од денот на неговиот избор до денот на објавувањето на конечните резултати од ДИК.

Концептот техничка влада предвидува соработка меѓу власта и опозицијата во периодот до спроведување на изборите, имајќи предвид дека одлуките усогласено треба да ги носат и министерот и заменикот.

Законот предвидува дополнителниот заменик на министерот заедно и рамноправно со
министерот да учествува во остварувањето на надлежностите предвидени во Законот
за организација и работа на органите на државната управа.

Заменикот заедно и и рамноправно со министерот ги разгледува и ги потпишува сите акти и документи кои ги донесува министерот или лица овластени од него, заменикот на министерот како и државниот секретар во соодветното министерство, а се однесуваат на правните, финансиските и кадровските прашања поврзани со организацијата на изборите.

Секој акт во смисла на овој закон се доставува до министерот и дополнителниот заменик министер.

Министерот и дополнителниот заменик министер се должни веднаш, а најдоцна во рок од еден ден да го одобрат или одбијат актот во смисла на овој закон.

Ако актот или документот е одобрен, т.е. потпишан само од едното лице се смета дека истиот не произведува правно дејство.

Во случај на несогласување меѓу министерот и дополнителниот заменик министер во министерствата во врска со тоа дали одредено правно, финансиско и кадровско прашање се однесува на организација на изборите, ДИК е должна, во рок од 24 часа да донесе одлука и истата да ја проследи до односното Министерство. Одлуката на ДИК е конечна.

Во случај на сомневање произлезено од можно незаконско постапување од страна на министерот и/или неговиот дополнителен заменик, може да се поднесе тужба до надлежниот суд. Во случај да се спорат административни процедури и одлуки, по истите може да се поднесе тужба до надлежниот Управен суд.

Согласно законот, дополнителниот заменик на министерот има право на неограничен пристап до сите акти, документи и информации кои му се на располагање на министерот.

Вработените во министерството на барање на дополнителниот заменик на министерот се должни да му ги достават сите акти, документи и информации кои му се на располагање на министерот.

Дополнителниот заменик на министерот има право на посебни советници и кабинетски службеници чиј број е еквивалентен на бројот на посебните советници и кабинетски службеници во кабинетот на министерот, според Законот за административни службеници.

МИА

ПОВРЗАНИ ВЕСТИ

ПОРТРЕТ: Оливер Спасовски, од адвокатски приправник до технички премиер

ПОРТРЕТ: Наќе Чулев, од оперативен разузнавач до технички министер за внатрешни работи

ПОРТРЕТ: Мила Царовска, од активиска до вицепремиерка за економски прашања

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Агенцијата за супервизија на осигурувањето вработува три лица, плата до 41.611 денари

Никола Осило

Дали со новите цени на горивата, буџетот се полни на сметка на граѓаните и компаниите

Редакција

Ќе прави ли Шилегов ново партиско дувло од новата фирма за парно греење?

Редакција