И по десет дена откако поранешниот македонски премиер, сега пратеник, Никола Груевски на својот Фејсбук профил соопшти дека е во Унгарија (13 ноември) и дека таму ќе бара политички азил, кој во меѓувреме веќе го доби, молк од македонските институции за овој голем скандал.
Периодот е подолг за уште неколку дена, ако се смета дека Груевски ја напуштил Македонија на 10 ноември, како што изјави српскиот претседател Александар Вучиќ, но за тоа нема официјална потврда од Македонија, ни од Албанија, од каде властите со сигурност знаат само кога излегол.
Сите земји од регионов низ кои била “маршутата“ на неговото бегство (Албанија, Црна Гора и Србија) излегоа со официјални информации, а единствено нема информации за тоа како побегнал, кој му помогнал и кога ја напуштил Македонија, од ниту една македонска институција: Министерството за внатрешни работи (МВР), Бирото за јавна безбедност, Министерството за надворешни работи, Управата за безбедност и контраразознавање, Финансиската полиција, Јавното Обвинителство…
Она што и е познато на јавноста е дека се водат две истраги во МВР, а предистражна постапка отвори и Јавното Обвинителство.
„Сакаме да дојдеме до конкретните информации и да ја информираме јавноста. Нам ни е важно тоа што се случило во Македонија. Контактираме со сите служби во регионот. Принципиелно би било сите институции да го заокружат тој систем и на крај да излеземе со конечна информација дали имал помош и како се случило неговото бегство“, изјави министерот за внатрешни работи, Оливер Спасовски пред неколку дена.
Во однос на информациите во медиумите дека Груевски слободно излегол од Македонија со лична карта, Спасовски истиот ден рече дека од јули 2017 година, по одземањето на патните исправи, е направен распис до сите гранични премини дека неможе да ја напушти Македонија ниту со лична карта.
„Прво треба да се лоцира одговорноста, да ги согледаме пропустите и нефункционалноста на системот во целина и ако тоа го согледаме, ќе можеме да ги отстраниме тие недостатоци за во иднина да немаме вакви ситуации. Многу е важно органите на спроведувањето на законот да имаат координација. Потребно е сите тие институции да се реформираат после 11 години заробена држава“, рече Спасовски.
Тоа е последната изјава на министерот Спасовски (и било која друга инстуција) за бегството на Груевски.
ПОВРЗАНИ ВЕСТИ
Вучиќ отвори нова дилема: Груевски влегол во Албанија легално или нелегално?
Српскиот претседател Вучиќ: Еве како побегна Груевски
Фото: Груевски/Фејсбук